sabato 1 maggio 2010

'E pparole

Quantè bello 'o culore d' 'e pparole,
e che festa addiventa nu fuglietto,
nu piezzo 'e carta -
nu' mporta si è stracciato
e pò azzeccato -
e si è tutto ngialluto
p' 'a vecchiaia,
che fa?
che te ne mporta?
Addeventa na festa
si 'e pparole
ca porta scritte
sò state scigliute
a ssicond' 'o culore d' 'e pparole.
Tu liegge
e vide 'o blù
vide 'o cceleste
vide 'o rrussagno
'o vverde
'o ppavunazzo,
te vene sotto all'uocchie ll'amaranto
si chillo c'ha scigliuto
canusceva
'a faccia,
'a voce
e ll'uocchie 'e nu tramonto.
Chillo ca sceglie,
si nun sceglie buono,
se mmescano 'e culure d' 'e pparole.
E che succede?
Na mmescafrancesca
'e migliar' 'e pparole,
tutte eguale
e d' 'o stesso culore:
grigio scuro.
Nun siente 'o mare,
e 'o mare parla,
dice.
Nun parla 'o cielo,
e 'o cielo è pparlatore.
'A funtana nun mena.
'O viento more.
Si sbatte nu balcone,
nun 'o siente.
'O friddo se cunfonne c' 'o calore
e 'a gente parla cumme fosse muta.
E chisto è 'o punto:
manco nu pittore
po' scegliere 'o culore d' 'e pparole.
[1971]
Da Le poesie di Eduardo (pag. 10), Einaudi

Questa poesia ha ispirato il tema artistico del Concerto del Primo Maggio 2010.


Nessun commento:

Posta un commento

Grazie per aver visitato questo blog!