Allùmmela na lampa nnanz' 'o muorto
pure si 'o padreterno nun ce sta,
pure si ll' 'e capito cu certezza
ca nun c'è lluce,
nun c'è llampa a uoglio,
né gas
né petrolio
o lucelettrica
ca po’ dà refrigerio
a nu defunto,
o na speranza
a chi è rimasto vivo.
Ma si 'e perduto na persona cara
ca t'ha lassato nu delore 'o core
ca nun è nu delore ca fa male
ma ch'è sulo 'o delore 'e nu delore:
appìcciela na lampa nnanz' 'o muorto.
Nun sì cuntento,
nun te fa piacere
'e vedè stu delore ca fa luce?
[1970]
da Le poesie di Eduardo (Einaudi) pag. 116
Nessun commento:
Posta un commento
Grazie per aver visitato questo blog!