Tutt'è silenzio dint'a sta nuttata
nun se sente nu passo 'e cammenà.
Nu ventariello tutta na serata
pare ca me vuleva accarezzà...
E finalmente chiagno! Tu nun vide,
tu staje luntano, comme 'o può vedé?
Però t' 'o ddico pecché tu me cride
e si me cride, chiagne nzieme a me!
Scenne stu chianto lento, doce doce,
nun aizo na mano p' 'asciuttà.
Io strillo pe' te fa' sentì sta voce,
ma tu nun può sentì... c' allùcco a ffà?
Tutt'è silenzio... ncielo quanta stelle!
Affaccete, tu pure 'e ppuò vedé:
songo a migliare, e saie pecché so' belle?
Pecché stanno luntano, comm' 'a tte!
da "'O penziero e altre poesie di Eduardo" - Einaudi - pag. 5
Nessun commento:
Posta un commento
Grazie per aver visitato questo blog!